尼马享受足球。(©AFP)
世界上总有啲球员，系你会对佢爱恨分明，从来两极冇话攞到个中庸位，啱啱荣升巴西队史入球王嘅尼马，大概就属于呢类型。撰文：球十三
尼马（Neymar）当年喺山度士初出道极速被捧为巨星，十三仲记得𠮶阵喺报馆开会时，建议做一个「明日球王」专题，结果俾某位编辑语带讥讽：「佢都得？呢啲货色……」事隔十几年，依家睇番尼马系咪「球王」？讲真系配唔上嘅，但呢个同时势（同代竞敌唔少），或者更重要系同巴西人嘅斗心有关。谂到佢之前踢巴塞隆拿确系好波，2016年喊住为国家圆奥运足球金牌梦、啱啱超越已故球王比利成为森巴兵团入球王，仲有仍然保持转会费世界纪录……，球王谈唔上，都应该配得巨星两个字啩？尤其系巴西人，至少视佢为国家英雄。
要憎佢嘅理由系唔少，有人会觉得佢喺2018年世界杯插水插得太浮夸，又或者认定佢只爱向钱看，喺巴黎圣日耳门执流摊赚完一大笔，「𡁻完唱」话自己曾经活喺地狱。
咁讲啦，插水其实系好多南美球员通病、拜金嘅更系一大箩。十三反而觉得尼马俾人感觉几率真，亦唔系钟意争嘢嘅人，从佢踢波嘅身体语言，尤其喺国家队系好享受。
踢嘅享受，睇嘅都系。
做呢行，随时准备好巨星退役就做专题，从来认为好似尼马呢啲爱享受，踢波似开P多过争嘢嘅巴西球员，随时早过「美C」挂靴。基斯坦奴朗拿度37岁去沙特阿拉伯、美斯36岁去美国，尼马？31岁就离开欧洲主流联赛。都系一句：为钱冇罪（仲要有价有市至得㗎）。但求佢踢多几年好波，与众同乐齐开P，球迷满足。
本文来源自:https://sports.now.com/mobileweb/news/details?id=38848258637
