英聯盃，一個好似相對被忽視嘅盃賽，今年因為曼聯同紐卡素呢兩間「有勢」嘅老牌球會，組成一個久違嘅「新鮮」決賽組合，忽然話題無盡。
唔係咩？兩隊對上一次喺決賽相遇，要追溯到1999年嘅英足盃，當年係曼聯爭三冠次關，結果曼聯贏由古列治領軍嘅紐卡素2:0，四日之後，曼聯反勝拜仁慕尼黑揚威歐聯，實現史無前例嘅三冠霸業。
貶吓眼差不多四份之一個世紀。
曼聯爭取自2017年歐霸盃後首個錦標，至於紐卡素當年不敵曼聯後就未再有佳作，今次係爭取球會自1969年以嚟首個錦標，超過半個世紀！
話兩隊「有勢」冇花假，紐卡素年前已轉化為富豪球會，至於曼聯賣盤消息未停過。講場內戰績，紐記固然大躍進，而曼聯喺坦夏改造後確係漸入佳境，今季英超爭前4機會唔錯，喺歐霸盃又新敗西甲榜首巴塞隆拿，勢頭勁！
到底邊隊率先破錦標荒，賽前最多人講當然係卡列斯極可能臨危受命為紐記把關，講得俗啲，當年歐聯決賽「派膠」歷歷在目，對佢足球事業直頭係毀滅性，久疏戰陣嘅佢會再「派膠」，抑或打番場爭氣波，重塑自己事業？
圖片來源 : ©AFP
本文来源自:https://sports.now.com/mobileweb/news/details?id=38037088237
