「我可能系香港唯一布力般球迷」，可能系每一个香港布迷有谂过嘅嘢，其实早于千禧前后Newsgroup盛行时都聚过一班布迷，可惜系睇过几次波之后就失联，慢慢就各散东西。直至2014年，我哋有三个香港布迷，喺英国布力般嘅Fb group 认识，喺网上倾下波经，直到喺当年嘅情人节决定约出嚟睇波！
能够喺情人节舍另一半一齐睇布力般比赛，呢份仲唔系真爱？！
所以我哋决定成立香港布力般流浪球迷会，创建自己嘅WhatsApp同Group Signal Group，甚至喺2018年打开Fb page 同IG向香港人推广布力般。
问：成立目标系咩？
对内，作为布迷之间桥梁，我哋成立嘅目标就系希望𠮶啲，曾经以为「我可能系香港唯一布力般球迷」相认，可以畀一个平台大家话当年，又可以倾下布力般波经；对外，我哋系2018年组成一支球迷会足球队，目标系「以球会友」，除咗一班布迷聚埋踢波之余，我哋仲希望借此机会同其他球迷会一齐友赛切磋，慢慢扩大球迷会嘅圈子。
喺旧年，我哋仲开咗个英冠以下嘅低组别球迷会Signal Group，希望畀一啲撑开低组别球会嘅球迷一个机会，与同好倾波下经。离开英超超过十年，布力般都慢慢离开大家嘅视线，大家都仲停留系「舒利亚瑟顿」、「暴力般」嘅印象，有啲新生代嘅球迷，甚至唔知道布力般赢过英超。我哋创建Fb 专页嘅目的，并唔想系围炉取暖，反而希望利用「香港布迷」呢个身份同大家同行，除咗同啲老球迷话当年，亦希望用唔同方向同手法，畀新球迷认识布力般呢队波。除咗介绍球会消息，我哋更希望立体咁讲布力般，集中去揾一啲新旧球员同各地布力般球迷小故事分享畀大家，喺佢哋嘅角度去睇呢间球会，了解一下佢哋点解咁多队唔捧，而去捧布力般。我哋相信，从每一个由布力般衍生出嚟嘅故事入面，都会睇到好多人情世故，希望可以保育到呢个时代嘅记忆同人情。
同埋我哋都希望利用呢个平台，介绍一班喺香港出生而去英国球坛追梦嘅球员，例如踢紧布力般青年军嘅慈英，同史笃城女子队嘅陈颂文、林裕殷，等大家支持佢哋，同跟进佢哋嘅发展近况。
问：布力般系英冠队，人气唔及欧洲主流班霸，当初成立球迷会有咩困难？
唔好讲话十年未重返英超，其实自捧杯之后经历3次降班，甚至跌到英甲，我哋相信到依家仍然不离不弃嘅坚系真布迷！咁当然要揾到呢班真布迷，如果冇科技帮手，球迷会绝对唔会成立到。自从我哋2014年喺英国布力般嘅Fb group 揾到香港布迷之后，就系呢啲Fb group 逐个英文姓氏系咁揾，逐个pm佢哋，逐个拉佢哋入group，都花咗唔少时间同心机。
我哋心知人数一定唔会多，但揾到一个多一个，令以为「我可能系香港唯一布力般球迷」嘅佢哋，觉得唔孤单，有人同你一齐撑㗎！
问：目前球迷会规模系点？
相比其他球迷会，我哋人数唔算多，大概有70人，而活跃既骨干成员有十几个，近年开始有啲都移民外地，所以我哋都好珍惜每一次搞活动嘅机会。纵然系咁，布迷胜在够团结，无论由搞睇波活动嘅场地、约友会搞友赛揾场地联系、营运专页嘅文章同拍片，到之前制作节目，每一个布迷都各司其职，发挥自己嘅能力，人虽少，但能量发放得好大！
我哋都系一班自布力般1994/95年捧杯之后，就支持球队嘅布迷，有啲更系自1992年升上刚成立嘅英超就开始支持，大大话话撑咗30年，由当年嘅学生，到依家有家庭有小朋友嘅中佬。不过喺我哋球迷会入面，都有一啲年轻嘅90后布迷，佢哋都系因为千禧年后，摩顿柏达臣同森巴嘅「暴力般时代」开始追捧。
问：联赛去到最后直路，点评论球队本季至今表现？
今季表现超出大部份布迷预期。球会改革管理模式，增设足球总监，负责转会、合约、球员分析、球探、医疗等等训练以外事务；而季前请到汤马臣呢个领队，之前未有英伦球会带波经验，加上有唔少主力免签离开，我哋预期都系护级在线、附加赛线下。截稿前仲喺头6名，系意外惊喜。
问：如果拣本季最出色嘅一位，系边个？
中坚Dominic Hyam，最近仲后补入选苏格兰代表队，季初由高云地利加盟，算系好能够接替离队他投米杜士堡嘅兰尼汉，佢发挥稳定，亦系球队嘅副队长。
问：争升班信心如何？
作为球迷当然希望球队能够重返英超，但同时好清楚球队现时实力。唔少英冠强权如列斯联或宾福特，都唔系一次附加赛就升到班。依家布力般阵容年轻，冇够份量嘅老大哥压场，顺境波通常发挥理想，先落后多数输波收场，咁嘅心理质素恐难应付附加赛嘅心理压力。若能进入附加赛，只望球队能够踢好每一场，踢成点已唔敢多想。
问：点睇今日对诺域治嘅关键大战（第6对第7位）？
布力般主场比较可靠，上场作客输俾伯明翰，球队上下心有不甘，喺主场球迷面对定必搏尽；但对于对方嚟讲，今场如果喺伊活败阵差不多无缘附加赛，一样毫无保留，估计会和波。
问：球迷会嚟紧有咩活动？
继续「以球会友」嘅方向搞活动，除咗同各球迷会踢友赛之外，都希望可以搞多啲跨球迷会睇波团，今季我哋都成功同米杜士堡、新特兰、卡迪夫城同史云斯球迷一齐睇波，打下牙骹战一齐交互，气氛相当热烈！因为我哋相信独乐乐不如众乐乐，能够一齐玩、一齐识朋友、一齐倾波经，先系搞球迷会最好玩之处。
【编按：布迷亲赴英国观看周五布力般大战诺域治，有兴趣追踪可浏览香港布力般流浪球迷会 HKBRSC官方Facebook与Instagram。】
【球迷会请入】逢周五上载
各球迷会与群组，若想分享你们的故事与活动，不妨电邮：
图片来源 : 受访者提供
本文来源自:https://sports.now.com/mobileweb/news/details?id=38300493733
